2011 წელს გამოსული FX-ის ამერიკული საშინელებათა ისტორია დღეს უკვე საკულტო სერიალია. მას სამართლიანად მიიჩნევენ ამერიკის ერთ-ერთ ყველაზე დიდ შოუდ. თრილერის ჟანრის მოყვარულები მას დიდი ხანია იცნობენ, თუმცა ამერიკული საშინელებათა ისტორია მხოლოდ თრილერი არაა და მაყურებელს გაცილებით ფართომასშტაბიანი დრამა დახვდება.
წარმოგიდგენთ ათ მთავარ მიზეზს, რის გამოც ღირს, ეს საკულტო ტელეშოუ აუცილებლად საყურებელ სერიალებში ჩასვათ:
1. სინამდვილეში, არც ისე საშიშია, როგორც თავიდან გგონიათ
სერიალის ერთგული მაყურებელი დაგვემოწმება, რომ ყველაზე საშიში მომენტები ეპიზოდების დასაწყისშია, მეორენაირად რომ ვთქვათ, სერიები შიშისმომგვრელი სცენებით იხსნება, მაგრამ თავად ეპიზოდები ნაკლებად საშიში და ძრწოლისმომგვრელია. ეს არაა იმ ტიპის სერიალი, რომლის მთავარი მიზანიც მაყურებლის შეშინებაა. ძრწოლის გარდა, უამრავ საინტერესო თემას გვთავაზობს.
2. სახასიათო, მრავალმხრივი ბუნების პერსონაჟი ქალები
თითოეულ ეპიზოდში მაყურებელი სრულიად განსხვავებულ პერსონაჟ ქალებს ეცნობა. ისინი შორს დგანან ქალის იმ იდეალური სახისგან, რომელსაც კულტურა ნორმად მიიჩნევს, რადგან ამ ქალებს მრავალი დანაშაულის და ცოდვის ჩადენა შეუძლიათ. ისინი შეიძლება იყვნენ მანიპულატორები, დაბოღმილები, მოღალატეები და ლოთებიც კი. მაგრამ ყოველი მათგანი ბრძოლისუნარიანია და მათი სიმტკიცე აღფრთოვანებას იწვევს. დიახ, ეს შოუ მხარს უჭერს და გვიჩვენებს ქალის მრავალფეროვან და ცოდვილ ბუნებას, რომელიც დადგენილ ჩარჩოებში არ თავსდება.
3. სექსი
ერთ-ერთი უმთავრესი ნიშანი, რაც ამერიკულ საშინელებათა ისტორიას გამოარჩევს, უცნაური, შემაძრწუნებელი და უჩვეულო სექსის სცენებია. მაყურებელს თითოეულ სეზონში სულ ცოტა ოთხი-ხუთი ასეთი სცენა ელოდება, თუმცა გაფრთხილებთ, ამ შოუში სექსის სცენების ხილვა უფრო მეტად შეგაძრწუნებთ, ვიდრე გასიამოვნებთ.
4. თითოეულ სეზონში ახალი მთავარი თემაა
თითოეული სეზონის დასასრულს შოუს რეჟისორი რაიან მერფი მომავალი სეზონის მთავარ თემაზე მიგვანიშნებს. მაყურებელი თუ კარგად დააკვირდება, თავადვე მიხვდება, რა თემა გაჰყვება ახალ სეზონს ლაიტმოტივად. მაგალითად, პირველი სეზონის მინიშნება იყო ბილი დინ ჰოვარდის მონოლოგი – რა გამანადგურებლად მოქმედებს გარემო ადამიანზე და აბოროტებს მას. მეორე სეზონის თემაზე “გრძნეულება”, მიანიშნებდა სიმღერა “I Put a Spell on You”. და ასე შემდეგ.
5. მრავალშრიანია
ამერიკული საშინელებათა ისტორია არავითარ შემთხვევაში არაა ამბავი უბრალოდ კუდიანებზე, ჯადოქრობაზე, ამოუცნობ არსებებსა და მოჩვენებებიან სახლებზე. ის საზოგადოების ყველაზე ძლიერი შიშების, დაცემული ადამიანების, გენდერული და სოციო-ეკონომიკური სისტემის შესანიშნავი ილუსტრაციაა. ის იმდენად მრავალშრიანი შოუა, რომ გაფიქრებთ, მსჯელობის და კამათის სურვილს გიჩენთ.
6. იდეალურად შერჩეული მუსიკა
თითოეული სეზონის საუნდტრეკი გასაოცარია! ორიგინალური მუსიკა სერიალისთვის ჩარლი კლოსერს (Nine Inch Nails) ეკუთვნის, თუმცა სერიალში მრავლადაა გამოყენებული ცნობილი მუსიკალური კომპოზიციის ქავერ ვერსიები. შერჩეული მუსიკა იდეალურად გადმოსცემს შოუს ხასიათს და განსაკუთრებულ განწყობას.
7. ტაისა ფარმინგას და ევან პიტერსის წყვილი
ტაისა ფარმინგა და ევან პიტერსი შოუში რამდენჯერმე ჩნდებიან სხვადასხვა წყვილის როლში. მათ თანამედროვე რომეო და ჯულიეტაც უწოდეს, რადგან ამ ორს შორის არსებული ქიმია და კავშირი საბოლოოდ საუკეთესო ეკრანულ წყვილს ქმნის.
8. დაუვიწყარი პერსონაჟები დაუვიწყარი ფრაზებით
სერიალის ნახვა მარტო იმიტომაც ღირს, რომ მრავალფეროვანი პერსონაჟები იხილოთ და მათ მიერ წარმოთქმული ფრაზები მოისმონოთ. მათი სიტყვები იუმორისა და სიბრძნის სინთეზია, რაც შოუს ინტელექტუალურობაზე მეტყველებს.
9. ზოგიერთი პერსონაჟი რეალური ადამიანის პროტოტიპია
დელფინა და მარი ლავეუები (რომელთა ისტორიასაც მაყურებელი მეორე სეზონში იხილავს), ისტორიულად არსებული პიროვნებების პროტოტიპებს წარმოადგენენ. მათზე ხმები დადიოდა, თითქოს ფსიქოპათები და ვუდუს ჯადოქრები იყვნენ. მეორე სეზონში ანე ფრანკი და დოქტორი არდენი გვხვდებიან. გარდა ამისა, სხვადასხვა სეზონში ხშირად წავაწყდებით ჰოლივუდის ცნობილ სახეებზე ალუზიებს.
10. უბრალოდ, ჯესიკა ლანჟი
ჯესიკა ლანჟი, რომელმაც შოუს განმავლობაში მრავალი სახე მოირგო და უკანასკნელ სეზონშიც გამოჩნდა, ამერიკული საშინელებათა ისტორიის დედოფალია. მის მიერ შესანიშნავად განსახიერებული მრავალმხრივი პერსონაჟები და განსაკუთრებული ქარიზმა ნებისმიერი პრეტენზიული მაყურებლის გულს დაიპყრობს. ის ნამდვილად გახლავთ ერთ-ერთი მნიშვნელოვანი ფაქტორი, რის გამოც ამ სერიალს უნდა უყუროთ.
