ქართული კინოს წარმატებებზე საერთაშორისო გამოცემები სულ უფრო ხშირად და უფრო პოზიტიურ კონტექსტში წერენ. ამბობენ, რომ ჩვენს ეროვნულ კინემატოგრაფს მეორე სუნთქვა გაეხსნა.
საერთაშორისო პრესის აღიარების პარალელურად, ქართული კინოპროდუქციის მიმართ მეტად პოზიტიური დამოკიდებულება ჩნდება სხვადასხვა პრესტიჟული ფესტივალების მხრიდანაც და ინდუსტრია ძალებს იკრებს შემდგომი განვითარებისთვის.
სწორედ ქართული კინოინდუსტრიის განვითარების მიზანმა გააერთიანა 40-ზე მეტი წამყვანი კომპანია და კინოწარმოების სფეროს პროფესიონალი, რომლებმაც 2017 წელს საქართველოს კინოკლასტერი დააარსეს. ამ საქმის მხარდამჭერად კი ევროკავშირისა და გერმანიის მთავრობის დაფინანსებით მიმდინარე პროექტი გამოვიდა, რომელსაც გერმანიის საერთაშორისო თანამშრომლობის საზოგადოება (GIZ) ახორციელებს.
საქართველოს კინოკლასტერის მიზნებს შორის ვკითხულობთ:
- საქართველოს კინოინდუსტრიის პოპულარიზაცია;
- კერძო და საჯარო სექტორებს შორის დიალოგის პლატფორმის განვითარება – ინდუსტრიის ინტერესების წარდგენა/დაცვა, როგორც სახელმწიფო, ასევე საერთაშორისო პარტნიორებთან;
- ქართულ და უცხოელ კინომწარმობლებს შორის თანამშრომლობის ხელშეწყობა. საერთაშორისო პარტნიორების მოძიება;
- კინოგანათლებისა და პროფესიული უნარების განვითარების ხელშეწყობა.
დღეისათვის კინოკლასტერი უკვე ნაყოფიერად თანამშრომლობს სხვადასხვა სახელმწიფო უწყებასთან, მათ შორის, საქართველოს ეროვნული კინოცენტრთან, ასევე სააგენტოსთან აწარმოე საქართველოში — კლასტერის წევრები აქტიურად თანამშრომლობდნენ პროგრამის – გადაიღე საქართველოში გუნდთან Cash Rebate-ის სქემის გაფართოებაზე, იგეგმება ერთობლივი ტრენინგები და ა.შ.
კონკრეტული შედეგები არსებობს საერთაშორისო კონტაქტების მიმართულებითაც – ხელი მოეწერა ურთიერთგაგების მემორანდუმს ბერლინში არსებულ პლატფორმასთან – Bridging the Dragon , რომელიც ევროპელ და ჩინელ კინომწარმოებლებს აკავშირებს ერთმანეთთან. კლასტერის კიდევ ერთი პარტნიორია International Emerging Film Talent Association (IEFTA), რომელიც კინოინდუსტრიის განვითარების თვალსაზრისით პერსპექტიულ რეგიონებში ახალი ტალანტების აღმოჩენისა და მათი განვითარების ხელშეწყობას უწყობს ხელს.
საერთაშორისო ასპარეზზე კონტაქტების გაფართოებას, კლასტერის ინტერნაციონალიზაციას მისი წევრები განსაკუთრებულ მნიშვნელობას ანიჭებენ. მათ წლევანდელ კანის კინოფესტივალზეც შეხვდებოდით, სადაც საინტერესო პროექტებით იყვნენ წარმოდგენილი.
რეზიდენციის პროგრამაში Cinefondation მონაწილეობას იღებდა კინოკლასტერის წევრის პროდიუსერ ვლადიმერ კაჭარავას სრულმეტრაჟიანი ფილმის პროექტი პანოპტიკონი. გარდა ამისა, კანის კინოფესტივალის ინდუსტრიულ პროგრამაში Producers Network მონაწილეობდა კინოკლასტერის წევრი კომპანია 20 Steps Productions-ის სრულმეტრაჟიანი ფილმის პროექტი ქორწილი ჩემს ქუჩაზე.
ამასთანავე, სწორედ კინოფესტივალის Market Screening-ის ფარგლებში აჩვენეს კინოკლასტერის წევრის, პროდიუსერ დავით ისაკაძის ფილმი უარყოფითი რიცხვები (რეჟისორი: უტა ბერია).
გამორჩეულ პროექტთაგან ერთ–ერთი იყო კომპანია ICEBREAKER–ის ახალი ჰორორ ჟანრის ფილმი Immersion, რომლის შესახებაც ჩვენმა მკითხველმა ექსკლუზიურად კანის კინოფესტივალიდან შეიტყო.
ფილმის რეჟისორი ჯაბა მელქაძეა, პროდიუსერი ელენე კოლელიშვილი, ხოლო სცენარის ავტორი ზაზა კოშკაძე.
“თითქმის 2-წლიანმა მუშაობამ და წლევანდელმა შეხვედრებმა ბერლინსა და კანში შედეგი გამოიღო და უკვე გვყავს დაინტერესებული თანაპროდიუსერები, როგორც საქართველოდან, ასევე საფრანგეთიდან და ფილმს, სავარაუდოდ, 2020 წლის გაზაფხულზე გადავიღებთ. მთელი ამ ხნის მანძილზე კინოკლასტერი სულ გვერდით გვედგა და ძალიან მნიშვნელოვანია ზოგადად მისი არსებობა კინოსფეროს განვითარებისთვის”, — ამბობს სინემანიასთან ინტერვიუს დროს ფილმის პროდიუსერი, ელენე კოლელიშვილი.
აღსანიშნავია, რომ გასული წლების მსგავსად, საქართველოს კინოკლასტერის წევრებმა წელსაც საინტერესო შეხვედრები გამართეს სხვადასხვა ქვეყნის პროდიუსერებთან, ფესტივალების სელექტორებთან, ფონდებთან, კინოორგანიზაციებთან და დამფინანსებლებთან.
ერთ–ერთი ასეთი შეხვედრის მონაწილე იყო კინოკლასტერის წევრი დავით ჯაფარიძე, რომელიც მსოფლიოს ერთ–ერთ ყველაზე მნიშვნელოვან კინოფესტივალს მცოცავი ოკუპაციის შესახებ დაწერილი სცენარით ეწვია.
აღსანიშნავია ისიც, რომ ქართული კინოკლასტერი აქტიურად მუშაობს ქვეყნის პოპულარიზაციის მიმართულებით და ცდილობს უცხოურ კინოსტუდიებს ჩვენი ქვეყანა გადასაღებად მიმზიდველ ლოკაციად გააცნოს. სწორედ ამიტომ, უახლოეს მომავალში კინოკლასტერი გეგმავს უფრო აქტიურ კომუნიკაციას სახელმწიფო ორგანიზაციებთან, რომლებიც ამ სფეროსთან პირდაპირ კავშირში არიან.
